Diben casglu a myfyrio ar weithgarwch gwella ansawdd yw eich galluogi i adolygu a gwerthuso ansawdd eich gwaith; er mwyn nodi’r hyn sy’n gweithio’n dda yn eich ymarfer a ble y gallwch wneud newidiadau; er mwyn ystyried a yw newidiadau rydych wedi’u gwneud wedi gwella’ch ymarfer neu pa gamau pellach y mae angen i chi eu cymryd.
Mae’r Cyngor Meddygol Cyffredinol yn dweud:
“Rhaid i chi a’ch arfarnwr neu’ch swyddog cyfrifol drafod lefel ac amlder y gweithgarwch gwella ansawdd sy’n briodol ar gyfer eich gwaith.
Rhaid i chi allu dangos eich bod wedi cymryd rhan mewn gweithgarwch gwella ansawdd sy’n berthnasol i bob agwedd ar eich ymarfer o leiaf unwaith yn eich cylch ailddilysu. Fodd bynnag, bydd lefel ac amlder y gweithgarwch yn dibynnu ar ei natur.
Dylech gymryd rhan mewn unrhyw archwiliad cenedlaethol neu adolygiad o ganlyniadau os oes un yn cael ei gynnal yn eich maes ymarfer. Hefyd, dylech fyfyrio ar ganlyniadau’r archwiliadau neu’r adolygiadau hyn, hyd yn oed os na allwch gymryd rhan yn uniongyrchol.
Dylech werthuso a myfyrio ar ganlyniadau’r gweithgaredd, gan gynnwys pa gamau rydych wedi’u cymryd mewn ymateb i’r canlyniadau ac effaith y newidiadau rydych wedi’u gwneud dros amser, a thrafod y canlyniadau hyn yn eich gwerthusiad.
Os nad ydych wedi gallu gwerthuso canlyniad y newidiadau rydych wedi’u gwneud neu’n bwriadu eu gwneud i’ch ymarfer, rhaid i chi drafod gyda’ch arfarnwr sut y byddwch yn cynnwys hyn yn eich cynllun datblygu personol ar gyfer y cyfnod arfarnu canlynol”.
Wrth ystyried gweithgareddau gwella ansawdd nid yw’r Cyngor Meddygol Cyffredinol yn diffinio’n union beth sy’n cyfrif fel Gweithgaredd Gwella Ansawdd at ddibenion ailddilysu.
Mae gweithgareddau gwella ansawdd yn amrywio gan ddibynnu ar natur eich gwaith a’ch ymarfer.
Dylech feddwl am y gweithgareddau neu’r gwaith rydych wedi’i wneud sydd wedi canolbwyntio ar wella ansawdd.
Dylech feddwl am bob elfen o’r term "Gweithgaredd Gwella Ansawdd”.
Gweithgaredd
Dylech gymryd rhan bersonol mewn gweithgaredd o ryw fath, gwneud rhywbeth, ond nid o reidrwydd yn gwneud yr holl waith, a dylai fod yn berthnasol i’ch ymarfer.
Ansawdd
Dylai’r gweithgaredd ganolbwyntio ar ryw agwedd ar ansawdd ymarfer, gan fesur eich ymarfer yn erbyn safon gydnabyddedig os yn bosibl
Gwella
Dylech fod yn rhan o broses o newid sy’n arwain naill ai at wella neu ddangos bod ymarfer da wedi’i gynnal a darparu tystiolaeth i ddangos hynny fel y bo’n briodol.
Mae’r Cyngor Meddygol Cyffredinol yn awgrymu’r enghreifftiau canlynol o Weithgaredd Gwella Ansawdd:
- Adolygu’ch perfformiad yn erbyn data meincnodi lleol, rhanbarthol neu genedlaethol os yw’n gadarn, wedi’i briodoli ac wedi’i ddilysu. Gallai hyn gynnwys ystadegau morbidrwydd a marwolaeth neu gyfraddau cymhlethdod.
- Archwiliad clinigol. Rhaid cynnwys tystiolaeth o gyfranogiad effeithiol mewn archwiliad clinigol neu ymarferiad gwella ansawdd cyfatebol sy’n mesur y gofal rydych wedi cyfrannu ato’n uniongyrchol.
- Adolygiad neu drafodaeth o’r achos. Cofnod o achosion diddorol neu heriol rydych wedi’u trafod ag un o’ch cymheiriaid, arbenigwr arall neu mewn tîm amlddisgyblaethol.
- Dadansoddiad o ddigwyddiad dysgu.
- Archwilio a monitro effeithiolrwydd rhaglen addysgu.
- Gwerthuso effaith ac effeithiolrwydd polisi iechyd neu ymarfer rheoli.
Mae’n rhaid i weithgaredd Gwella Ansawdd gael ei gynnal o leiaf unwaith yn ystod y cylch ailddilysu.
Mae’n bosibl y bydd canllawiau Colegau Brenhinol a chanllawiau arbenigeddau penodol yn nodi bod angen cynnal gweithgaredd o’r fath mwy nag unwaith. Gall Colegau Brenhinol bennu’r hyn sydd ei angen mewn perthynas â’u harbenigeddau eu hunain. At ddibenion ailddilysu, bydd eich Swyddog Cyfrifol yn ystyried gofynion y Cyngor Meddygol Cyffredinol, nid argymhellion eich Coleg Brenhinol, wrth wneud argymhelliad.
Mae llawer o sefydliadau’n gofyn am gyfranogiad mewn gweithgaredd ‘archwilio’ sy’n adolygu ansawdd eich gwaith. Os yw’r adolygiad hwn yn nodi y gallai ansawdd gofal gael ei wella, mae angen gweithgaredd pellach i wneud newid, a dangos bod gwelliant wedi’i sicrhau, er mwyn cwblhau hyn fel ‘gweithgaredd gwella ansawdd’.
Os ydych yn cadarnhau eich bod yn cyflawni i safon uchel, mae’n bosibl na fydd y gweithgaredd hwn yn nodi unrhyw feysydd ar gyfer newid neu botensial am welliant.
Lle bynnag y bo modd, er mwyn dangos a oes gwelliant wedi digwydd, neu os yw’r gweithgaredd wedi dangos tystiolaeth o ymarfer da, dylid ailadrodd y gweithgaredd neu gynnal archwiliad arall maes o law.
Dylech geisio darparu tystiolaeth o Weithgaredd Gwella Ansawdd yn eich holl waith.
Dylai’r gweithgaredd fod yn berthnasol i’ch gwaith ac yn seiliedig ar eich ymarfer yn y DU.
Dylai’r myfyrdod yng nghofnod MARS ar gyfer eich arfarniad ganolbwyntio ar sut byddai’r newidiadau arfaethedig neu wirioneddol yn arwain at welliant mewn gofal cleifion.
Mae nifer o dempledi Gweithgaredd Gwella Ansawdd MARS wedi’u teilwra ar gyfer mathau gwahanol o weithgareddau, gan gynnwys templed ‘arall’ cyffredinol. Mae’r penawdau wedi’u cynllunio i gaffael y wybodaeth ofynnol.
Eich Swyddog Cyfrifol a fydd yn penderfynu a oes ‘digon’ o weithgaredd gwella ansawdd dros eich cylch ailddilysu.
Mae’n gallu bod yn gymharol anodd penderfynu a ydych wedi gwneud digon.
Mae’n bosibl y bydd un darn mawr o waith, dros 2 neu 3 chyfnod arfarnu yn aml, yn bodloni’r holl ofynion. Mae’n debyg na fydd gweithgareddau symlach, fel un adolygiad achos neu drafodaeth, yn ddigon ar eu pennau eu hunain, ond gallent fod yn dderbyniol wrth gael eu cyfuno â nifer o weithgareddau Gwella Ansawdd syml eraill.
Os yw’ch arfarniadau’n cynnwys ychydig iawn o dystiolaeth yn unig o Weithgareddau Gwella Ansawdd, mae’n bosibl y bydd eich arfarnwyr, neu’r Swyddog Cyfrifol, o’r farn nad ydych wedi gwneud digon i fodloni’r gofynion ailddilysu.
Mae’r adnodd yn ystyried pob un o nodweddion Gweithgaredd Gwella Ansawdd a ddisgrifir gan y Cyngor Meddygol Cyffredinol:
- Perthnasedd – perthnasol i’ch gwaith a chyfranogiad gweithredol
- Cadarn a Systematig – tystiolaeth o gynllunio
- Ystyried Ymarfer Da – seiliedig ar dystiolaeth
- Cyfathrebu – sgwrs â chymar neu’r tîm
- Ystyried ymarfer presennol – disgrifiad, myfyrdod, mesur y broses gyfredol
- Canlyniad neu Newid – dangos canlyniad neu newid
- Gweithredu – mewn ffordd briodol ac mewn ymateb i’r canlyniadau
- Gwella – mae gwelliant wedi’i sicrhau neu mae ymarfer da wedi’i gynnal
- Myfyrio – sut aethoch ati i ddefnyddio’r wybodaeth, myfyrio ar y wybodaeth, beth mae’n ei ddweud am eich ymarfer, sut rydych yn bwriadu datblygu neu addasu’ch ymarfer
Os yw’r Gweithgaredd Gwella Ansawdd yn cynnwys pob un o’r pwyntiau bwled uchod, mae’n debygol o gael ei ddilysu gan eich arfarnwr at ddibenion ailddilysu.
Os oes bylchau sylweddol, mae’ch arfarnwr yn debygol o ysgrifennu ‘angen mwy o waith’ wrth ymyl y Gweithgaredd Gwella Ansawdd yn eich tudalen ailddilysu, ac fel arfer bydd yn nodi bod angen cwblhau’r gwaith hwn yn eich CDP ar gyfer y flwyddyn nesaf.
Mae’n syniad da dechrau gweithio ar y Gweithgaredd Gwella Ansawdd ar gyfer ailddilysu yn gynnar yn y cylch, er mwyn sicrhau bod gennych ddigon o amser i sicrhau bod gennych ddigon o dystiolaeth o ansawdd eich gwaith erbyn eich proses ailddilysu.
Gall defnyddio’r cylch gwella ansawdd Cynllunio, Gwneud, Astudio, Gweithredu eich helpu i gadarnhau a yw’ch gweithgaredd yn bodloni’r trothwy. Yn gyffredinol, mae’ch arfarnwr eisiau penderfynu a fyddai’ch camau gweithredu a’ch myfyrdod mewn perthynas â’ch gweithgaredd, waeth a yw’n archwiliad, yn adolygiad achos neu’n gyfres o achosion, yn golygu y byddai unrhyw wendidau a nodwyd ym maes rheoli cleifion yn llai tebygol o ddigwydd yn dilyn eich myfyrdod na chyn eich myfyrdod ar y mater.
Mae’r Cyngor Meddygol Cyffredinol yn nodi bod y broses o ddangos eich bod yn cynnal ymarfer da yn ganlyniad derbyniol, ond y byddai’n ddefnydd llawer gwell o’ch amser a’ch ymdrechion i ddewis gweithgaredd lle rydych yn credu bod modd gwella ansawdd eich gwaith, yn hytrach na dim ond cadarnhau’ch disgwyliadau nad oes angen gwella. Unig ddiben llawer o ‘archwiliadau’ yw adolygu perfformiad er mwyn dangos bod safonau’n cael eu bodloni, yn hytrach na bod yn ddull o wella ansawdd gofal.
Mae sawl ffordd o nodi meysydd ar gyfer gwelliant:
- DPP - rydych yn dysgu am ddull ymarfer gwell, tystiolaeth newydd sy’n gofyn am gamau gweithredu, dulliau newydd rydych yn penderfynu eu mabwysiadu
- Mae adolygiad yn erbyn data sylfaenol neu ganllawiau yn nodi bod angen gwella’ch perfformiad
- Mae digwyddiadau arwyddocaol, digwyddiadau dysgu, cwynion, adborth gan gleifion, neu adborth gan gydweithwyr yn nodi potensial ar gyfer gwelliant
- Gallai rhywbeth sy’n ‘mynd dan eich croen’ fod yn faes i’w wella
Mae rhagor o wybodaeth am Weithgaredd Gwella Ansawdd ar gael
Cliciwch yma ar gyfer syniadau ar gyfer Gweithgareddau Gwella Ansawdd.
Mae Coleg Brenhinol yr Ymarferwyr Cyffredinol wedi llunio canllawiau manwl ar Wella Ansawdd ar gyfer meddygon teulu sy’n berthnasol i feddygon eraill
https://www.rcgp.org.uk/-/media/Files/CIRC/Quality-Improvement/RGCP-QI-Guide-260216.ashx?la=en
Mae’n bosibl y bydd gan sefydliadau eraill, fel Colegau Brenhinol a Byrddau Iechyd, adnoddau ar gyfer Gwella Ansawdd hefyd.