Mae’r Cyngor Meddygol Cyffredinol yn dweud:
“Mae DPP yn eich helpu i fod yn gyfoes ac yn gymwys a chynnal ansawdd eich holl waith, ac mae’n hyrwyddo ac yn cefnogi gwelliannau mewn ymarfer.
Rhaid i chi gwblhau gweithgareddau DPP bob blwyddyn.
Rhaid i’ch gweithgareddau DPP gwmpasu’ch holl ymarfer, a chael eu teilwra i’ch cwmpas ymarfer ac anghenion.
Dylai’ch anghenion dysgu a’ch cynlluniau ar gyfer eich DPP gael eu hadlewyrchu yn eich cynllun datblygu personol ar gyfer y flwyddyn i ddod.
Dylai DPP ganolbwyntio ar ganlyniadau neu allbynnau yn hytrach nag ar fewnbynnau.
Rhaid i chi fyfyrio ar yr hyn rydych wedi’i ddysgu o’r gweithgaredd a sut gallai hyn helpu i gynnal neu wella ansawdd eich ymarfer.
Rhaid i chi fyfyrio ar eich gweithgareddau DPP a’u trafod ym mhob arfarniad blynyddol o ymarfer cyfan.”
Canllaw’r Cyngor Meddygol Cyffredinol ar DPP
Cofiwch y canlynol – ‘ansawdd nid nifer’, ‘mae myfyrio’n hanfodol’ a ‘dylai gwybodaeth ategol gwmpasu pob agwedd ar eich gwaith’.
Mae diweddaru’ch gwybodaeth wedi bod yn weithgaredd proffesiynol allweddol erioed. Mae’r rhan fwyaf o Golegau Brenhinol a chyfadrannau meddygol wedi cyhoeddi cyngor ar sut mae meddygon sy’n gweithio yn eu harbenigeddau yn gallu dangos DPP priodol ar draws eu cwricwlwm, a gallant bennu isafswm o oriau neu gredydau. Nid yw’r Cyngor Meddygol Cyffredinol yn pennu nifer y pwyntiau DPP y dylech eu casglu ar gyfer y broses arfarnu neu ailddilysu, ond nodir bod angen tystiolaeth o weithgaredd DPP perthnasol, a thystiolaeth o fyfyrdod bob blwyddyn.
Gallwch gynnwys unrhyw weithgaredd DPP yn eich ffolder arfarnu, ond nid yw’n ofynnol i chi gynnwys popeth. Dylech ganolbwyntio ar fyfyrio ar y gweithgaredd DPP mwy arwyddocaol, yn enwedig y gweithgaredd sydd wedi newid eich ymarfer, a allai fod yn sylfaen i drafodaeth ddefnyddiol gyda’ch arfarnwr.
Bydd eich arfarnwr eisiau trafod cynnydd ar yr eitemau DPP a gynlluniwyd yn y broses DPP y llynedd.
Dylech geisio cynnwys enghreifftiau o DPP sy’n cwmpasu eich holl ymarfer. Nid oes angen i chi gynnwys eich holl ymarfer bob blwyddyn, ond dros y cylch ailddilysu dylech gyfeirio at ystod eang o weithgarwch. Dylech geisio osgoi sefyllfa lle mae pob arfarniad yn canolbwyntio ar faes diddordeb penodol gan eithrio meysydd eraill sy’n berthnasol i’ch ymarfer.
Mae’n bosibl y bydd defnyddio dulliau dysgu amrywiol yn fwy effeithiol na chyfyngu’ch gweithgaredd i un dull e.e. darllen, dysgu ar-lein, dysgu mewn tîm, darlithoedd a chynadleddau.
Bydd myfyrio ar eich gweithgaredd DPP yn dangos sut rydych yn sicrhau bod eich ymarfer yn gyfoes - gan gynnal a gwella ansawdd eich gwaith proffesiynol.
Gall adolygu’ch ymarfer a’ch adborth yn ymwneud ag ansawdd eich gwaith proffesiynol nodi meysydd ar gyfer gweithgarwch DPP.
Os ydych yn darparu llawer o wybodaeth gysylltiedig gan gynnwys gwybodaeth sy’n deillio o ddarllen, dysgu ar-lein, neu wybodaeth am bwnc clinigol penodol, dylech ystyried dosbarthu a chrynhoi’ch holl weithgareddau fel rhestr a myfyrio’n fanwl ar 2-3 elfen lle mae’ch dysgu wedi bod yn fwyaf arwyddocaol, neu lle mae’ch ymarfer wedi newid o ganlyniad i’r gweithgaredd. Mae’ch trafodaeth arfarnu yn canolbwyntio llai ar yr hyn rydych wedi’i wneud, a mwy ar sut mae wedi newid eich ymarfer, er enghraifft, ar ôl myfyrio ar y gweithgaredd hwn beth fyddwn i’n rhoi’r gorau i’w wneud, yn parhau i’w wneud neu’n dechrau ei wneud?